"Bornmut" klubi va AQSH terma jamoasining 26 yoshli yarimhimoyachisi Tayler Adams yarim himoya chizig‘ini kuchaytirish uchun "Manchester Yunayted" sotib olishi mumkin bo‘lgan futbolchilar ro‘yxatiga kiritildi. Klub Angliya Premyer-ligasida to‘p tepish tajribasiga ega bo‘lgan futbolchilarga ko‘proq e’tibor qaratish orqali maydon markazini mustahkamlashga harakat qilmoqda. Bu haqda jurnalist Ben Jeykobs ma’lum qildi.
Manbaga ko‘ra, Adams "Manchester Yunayted" qiziqishlari doirasidagi boshqa futbolchilarga nisbatan arzonroq muqobil sifatida baholanmoqda. Adam Uorton va Karlos Baleba kabi yarim himoyachilar transferi klubga 100 million funtdan ancha qimmatga tushishi mumkin, bu esa "Manchester Yunayted"ni transfer bozorida turli variantlarni o‘rganishga undamoqda.
Tayler Adams Angliya Premyer-ligasida 69 ta o‘yin o‘tkazgan. U "Lids Yunayted" safida 24 ta o‘yin o‘tkazdi, shundan so‘ng u "Bornmut"ga o‘tdi va u yerda besh yillik shartnoma imzoladi. Transfermarkt portali ma’lumotiga ko‘ra, futbolchining bozor narxi 25 mln yevroni tashkil etadi.
