Niderlandiyalik afsonaviy sobiq futbolchi Marko van Basten "Alaves"ning Madridning "Real" klubiga qarshi o‘yinida penalti belgilanmagani haqidagi fikrlari bilan o‘rtoqlashdi.
Uchrashuvning 88-daqiqasida Vinisius Junior jarima maydoni ichida yiqilib tushgan vaziyatda hakam qoidabuzarlikni qayd etmadi. Vaziyat ko‘plab bahs-munozaralarga sabab bo‘ldi: uchrashuv yakunlangach, "qaymoqranglilar" vakillari hakamning qaroridan ochiqchasiga norozilik bildirishdi. Van Basten bunday nuqtai nazarga qo‘shilmaydi.
"Bu penalti emas. Ha, kontakt bor edi, lekin Vinisius bu kontaktni kutgan edi va unga tegib ketishganini his qilgandan so‘ng, maydonga juda oshkorona yiqildi. Uning haqiqatan ham raqib zarbasidan yiqilganiga ishonish qiyin," - deya niderlandiyalikning so‘zlarini keltiradi The Touchline.
Uchrashuv Xabi Alonso jamoasining 2:1 hisobidagi g‘alabasi bilan yakunlandi.













