Amerikalik bokschi, besh vazn toifasida jahon chempionligini qo‘lga kiritgan Terens Krouford (42-0, 31 KO) professional faoliyatini yakunlaganini e’lon qildi.
“Men sportni tark etyapman. Kuchim qolmagani uchun emas, balki isbotlash uchun hech narsa qolmagani uchun bu qarorga keldim.
Har bir sportchi bunday lahza kelishini biladi, faqat qachon kelishini bilmaydi. Butun umrim davomida nimanidir quvib yashadim, ammo bu kamarlar, pul yoki sarlavhalar emas edi. Bu — butun dunyo senga shubha bilan qaragan paytda ham o‘zingni namoyon etish va hammaning yanglishayotganini isbotlash tuyg‘usi.
Men oilam uchun jang qildim. Shahrim uchun jang qildim. Hech narsasi bo‘lmagan, faqat orzusi va bir juft qo‘lqopi bo‘lgan bolakay — o‘sha o‘zim uchun jang qildim va buni o‘zim to‘g‘ri deb bilgan yo‘l bilan amalga oshirdim. Bu sportga har bir nafasimni bag‘ishladim”, deya yozdi Krouford o‘zining ijtimoiy tarmoqdagi sahifasida.
Ma’lumot uchun, Terens Krouford 38 yoshda. Amerikalik bokschi professional faoliyatini 2008-yilda boshlagan. U 2014-yilda yengil vaznda (-61,2 kg) Jahon chempioni bo‘ldi. 2017-yilda birinchi yarim yengil vaznda (-63,5 kg) mutlaq Jahon chempioniga aylandi. 2023-yilda yarim o‘rta vaznda (-66,7 kg), 2024-yilda birinchi o‘rta vaznda (-69,9 kg gacha) chempionlikni qo‘lga kiritdi. 2025-yilda esa ikkinchi o‘rta vaznda (-76,2 kg gacha) mutlaq Jahon chempioni unvonini qo‘lga kiritdi. Professional faoliyati davomida Krouford biror marta ham mag‘lub bo‘lmagan: uning rekordi — 42 ta g‘alaba (31 martasi nokaut).
