Birlashgan Arab Amirliklarining Dubay shahri mezbonlik qilgan va Xalqaro boks assosiasiyasi (IBA) tomonidan tashkil etilgan Jahon chempionati -60 kg vazn toifasida rossiyalik bokschi Vsevolod Shumkov oltin medalni qo‘lga kiritdi. Final jangida u 2024-yilgi Olimpiya o‘yinlari chempioni, o‘zbekistonlik Abdumalik Halokovni mag‘lub etdi. Jang davomida Shumkov raqibining qulog‘ini tishlab olgani bilan bog‘liq holat qayd etilgan edi.

Shumkov rossiyalik jurnalistning “Jahon chempionati finalida uning Mayk Tayson uslubidagi harakatlarini qanday izohlaysiz?” degan savoliga javoban bu holat jang natijasiga ta’sir qilmaganini ta’kidladi.

“Rostini aytsam, men Jahon chempionati oltin medali uchun uzoq vaqt intilib keldim. Aynan shu raqibim bilan to‘rt marta to‘qnash kelganman. Afsuski, muhim turnirlarda unga mag‘lub bo‘lgan edim. Endi esa Jahon chempionati finali. Men barcha imkoniyatlarimni ishga solib, chempion bo‘lishga harakat qildim. Ehtimol, bu holat meni biroz hayajonga solib yubordi. Aslida bu haqiqiy tishlash ham emas, shunchaki uning qulog‘i biroz tirnaldi, lekin buning hech qanday jiddiy tomoni yo‘q”, dedi Shumkov.

Shuningdek, rossiyalik bokschi ikkinchi va uchinchi raundlarda aniq g‘alaba qozonganini, bu “kichik hodisa” jang natijasiga ta’sir qilmaganini aytib o‘tdi.