«Manchester Siti» bugun Markaziy Osiyoda maishiy texnika ishlab chiqaruvchi eng yirik kompaniya — Artel Electronics bilan yangi mintaqaviy hamkorlik boshlanganini e’lon qilgan edi. Kompaniya portfeliga Artel, Shivaki va Avalon brendlari kiradi.

Yangi kelishuvga ko‘ra, Artel Electronics klubning Rasmiy mintaqaviy hamkoriga aylanadi. Shuningdek, kompaniya «Manchester Siti»ning O‘zbekiston va Markaziy Osiyodagi boshqa muhim bozorlarda eksklyuziv Televizor hamkori bo‘ladi.

Ushbu hamkorlik «Manchester Siti» uchun mintaqadagi ilk sheriklik hisoblanadi, shuningdek, APL klubi ilk bor o‘zbekistonlik brend bilan tijoriy kelishuvga kirishmoqda.

Bu kelishuv O‘zbekiston futboli uchun muhim bir pallada amalga oshirildi — mamlakat tarixda ilk bor FIFA Jahon chempionatiga yo‘llanma oldi va mahalliy iqtidorlar tobora yuksalib bormoqda.

«Manchester Siti»ning futbol bo‘yicha tajribasi hamda Artel Electronics’ning texnologiya, sifat va dizayn standartlarini oshirishga qaratilgan intilishini birlashtirgan holda, hamkorlik O‘zbekistonda jadal rivojlanayotgan futbol bozoriga tayanishni hamda klub bilan mintaqa o‘rtasidagi aloqalarni yanada mustahkamlashni maqsad qilgan.

O‘zbekiston va kengroq mintaqa muxlislari uchun ushbu hamkorlik mahsulotga asoslangan kampaniyalar, do‘kon ichidagi faollashuvlar, raqamli kontent va boshqa tashabbuslar orqali klub bilan yaqinroq muloqot qilish imkoniyatlarini yaratadi.

City Football Group’ning Global hamkorlik sotuvlari bo‘yicha vise-prezidenti Keytlin Bil shunday dedi:

«Bugun Artel Electronics bilan yangi mintaqaviy hamkorlikni e’lon qilayotganimizdan juda mamnunmiz. Abduqodir Husanov joriy yil boshida “Manchester Siti”ga qo‘shilganidan so‘ng, O‘zbekiston va Markaziy Osiyodan klubga bo‘lgan qiziqish sezilarli darajada oshdi va ushbu hamkorlik mintaqadagi ishtirokimizni yanada mustahkamlaydi.

Biz Artel Electronics bilan birgalikda mintaqadagi mavjud va yangi muxlislar bilan ishlashni intiqlik bilan kutmoqdamiz».

Artel Electronics’ning Marketing bo‘yicha rahbari Nodir Hikmatillayev esa quyidagilarni ta’kidladi:

«Bugungi “Yangi O‘zbekiston” ochiqlik, jadal taraqqiyot va butun mamlakat bo‘ylab insonlar talablarining oshib borayotgani bilan tavsiflanadi. O‘zbekistonning yetakchi ishlab chiqaruvchisi sifatida biz bu intilishlarga jahon standartlariga javob beradigan texnologiya va mahsulotlar bilan javob berish mas’uliyatini his qilamiz.

Dunyoning eng yetakchi futbol klublaridan biri — “Manchester Siti” bilan hamkorlik qilish mamlakatimiz uchun yangi davrni aks ettiradi. Biz birgalikda jahon darajasidagi futbolni O‘zbekiston va Markaziy Osiyodagi muxlislar uyiga olib kirish, yangi avlod iqtidorlarini ilhomlantirish va “Yangi O‘zbekiston” brendlari global maydonda nimalarga qodir ekanini ko‘rsatishni istaymiz».