«Манчестер Сити» бугун Марказий Осиёда маиший техника ишлаб чиқарувчи энг йирик компания — Artel Electronics билан янги минтақавий ҳамкорлик бошланганини эълон қилган эди. Компания портфелига Artel, Shivaki ва Avalon брендлари киради.

Янги келишувга кўра, Artel Electronics клубнинг Расмий минтақавий ҳамкорига айланади. Шунингдек, компания «Манчестер Сити»нинг Ўзбекистон ва Марказий Осиёдаги бошқа муҳим бозорларда эксклюзив Телевизор ҳамкори бўлади.

Ушбу ҳамкорлик «Манчестер Сити» учун минтақадаги илк шериклик ҳисобланади, шунингдек, АПЛ клуби илк бор ўзбекистонлик бренд билан тижорий келишувга киришмоқда.

Бу келишув Ўзбекистон футболи учун муҳим бир паллада амалга оширилди — мамлакат тарихда илк бор FIFA Жаҳон чемпионатига йўлланма олди ва маҳаллий иқтидорлар тобора юксалиб бормоқда.

«Манчестер Сити»нинг футбол бўйича тажрибаси ҳамда Artel Electronics’нинг технология, сифат ва дизайн стандартларини оширишга қаратилган интилишини бирлаштирган ҳолда, ҳамкорлик Ўзбекистонда жадал ривожланаётган футбол бозорига таянишни ҳамда клуб билан минтақа ўртасидаги алоқаларни янада мустаҳкамлашни мақсад қилган.

Ўзбекистон ва кенгроқ минтақа мухлислари учун ушбу ҳамкорлик маҳсулотга асосланган кампаниялар, дўкон ичидаги фаоллашувлар, рақамли контент ва бошқа ташаббуслар орқали клуб билан яқинроқ мулоқот қилиш имкониятларини яратади.

City Football Group’нинг Глобал ҳамкорлик сотувлари бўйича вице-президенти Кейтлин Бил шундай деди:

«Бугун Artel Electronics билан янги минтақавий ҳамкорликни эълон қилаётганимиздан жуда мамнунмиз. Абдуқодир Ҳусанов жорий йил бошида “Манчестер Сити”га қўшилганидан сўнг, Ўзбекистон ва Марказий Осиёдан клубга бўлган қизиқиш сезиларли даражада ошди ва ушбу ҳамкорлик минтақадаги иштирокимизни янада мустаҳкамлайди.

Биз Artel Electronics билан биргаликда минтақадаги мавжуд ва янги мухлислар билан ишлашни интиқлик билан кутмоқдамиз».

Artel Electronics’нинг Маркетинг бўйича раҳбари Нодир Ҳикматиллаев эса қуйидагиларни таъкидлади:

«Бугунги “Янги Ўзбекистон” очиқлик, жадал тараққиёт ва бутун мамлакат бўйлаб инсонлар талабларининг ошиб бораётгани билан тавсифланади. Ўзбекистоннинг етакчи ишлаб чиқарувчиси сифатида биз бу интилишларга жаҳон стандартларига жавоб берадиган технология ва маҳсулотлар билан жавоб бериш масъулиятини ҳис қиламиз.

Дунёнинг энг етакчи футбол клубларидан бири — “Манчестер Сити” билан ҳамкорлик қилиш мамлакатимиз учун янги даврни акс эттиради. Биз биргаликда жаҳон даражасидаги футболни Ўзбекистон ва Марказий Осиёдаги мухлислар уйига олиб кириш, янги авлод иқтидорларини илҳомлантириш ва “Янги Ўзбекистон” брендлари глобал майдонда нималарга қодир эканини кўрсатишни истаймиз».