Farg‘onaning "Neftchi" klubi 2025 yilgi mavsumda chempionlik shohsupasini egallab, millionlab muxlislarini quvontirdi.
Yangi mavsumda jamoa nafaqat bu muvaffaqiyatni mustahkamlashni, balki xalqaro maydonlarda ham munosib o‘yin ko‘rsatib, Farg‘ona va O‘zbekiston sharafini baland ko‘tarishni maqsad qilgan. Shu sababli klub tarkibini yanada mahoratli va iste’dodli futbolchilar bilan boyitish yo‘lida ish olib bormoqda.
Tanishing: braziliyalik mohir yarim himoyachi Jurani Fransisko Fereyra, ya’ni Ratinyo. U 1996 yil 1 oktyabrda Braziliyaning Cavalcante shahrida tug‘ilgan. Futbolchilik faoliyatini 2017 yilda “Arapongas” jamoasida boshlagan, keyinchalik “Itaberal”, “Itabaiana”, “Goias”, 2019/20 yillarda Janubiy Koreyaning “Gvanju” jamoasida, 2021 yilda esa o‘z yurti jamoalarida: “Paysandu”, “Londrina”, “Botafogo-PB”, “Retro”, “Maguary” va 2024 yildan O‘zbekistonning “Dinamo” jamoasida o‘ynagan.
Ratinyo O‘zbekiston Superligasi va Kubogi musobaqalarida jami 22 ta o‘yinda maydonga tushib, 2 ta gol urdi va 3 ta golli uzatmaga mualliflik qildi. Ikki mavsumdan beri mamlakatimizda to‘p surib, ajoyib o‘yin namoyish etayotgan braziliyalik futbolchi bilan "yo‘lbarslar" bilan ikki yillik shartnoma imzoladi.
