«Andijon» klubi qishki transfer oynasida tarkibini sezilarli darajada kuchaytirayotganidan xabaringiz bor.

Kuni kecha iste’dodli himoyachi Odil Abdumajidov rasman «Burgutlar» a’zosi sifatida tanishtirildi.

Shundan so‘ng klub matbuot xizmati ushbu futbolchi bilan suhbatlashdi.

— Odiljon «Andijon» klubiga o‘tganingiz bilan tabriklayman. Bu qanday yuz berdi?

— Tabrik uchun katta rahmat. 3-4 ta takliflar bo‘layotgandi. O‘zimizni chempionatdan ham, xorijdan ham qiziqishlar bor edi. Shularni ko‘rib chiqayotgandim. Keyin Samvel Vyacheslavovich chaqirdi va biz ko‘rishdik. Maqsad va barchasini tushuntirganidan keyin «Andijon»ga o‘tishga qaror qildim. Bu taklif menga ma’qul keldi.

— Katta futbolga Andijonda qadam qo‘ygansiz va siz uyingizga qaytdingiz. Bu siz uchun nimani bildiradi?

— O‘zim tug‘ilib o‘sgan joy. Ota-onam, yaqinlarim hammasi shu yerda. Baribir Andijonda yaqinlaringiz ko‘z o‘ngida to‘p surish boshqacha zavq bag‘ishlaydi. Mas’uliyati ham boshqacha bo‘ladi. Hammasi yaxshi bo‘ladi, degan umiddaman.

— Yangi mavsumda jamoani maqsadi katta. Siz esa uning bir bo‘lagiga aylanyapsiz. Mas’uliyat yuki og‘irlik qilmaydimi?

— Hech qanaqa og‘irlik qilmaydi. Aksincha, qancha mas’uliyat yuqori bo‘lsa, futbolchi o‘sib boraveradi. Bu menga o‘sishimga katta yordam beradi, deb o‘ylayman. Anchadan beri futbol o‘ynayman. Har xil joylarda o‘ynadim. Barchasi joyida bo‘ladi.

— Bu yil «Turon»da va keyin «Sho‘rta»da o‘ynadingiz. Lekin «Sho‘rtan» ligani tark etdi. Shunday ekan, ortda qolgan mavsum haqida nima deya olasiz?

— Qiyin o‘tdi, deya olmayman. Futbolda har xil holatlar bo‘ladi. «Sho‘rtan»ga kelgan paytda jamoa oxirgi o‘rinda edi. Jamoani olib qolish uchun o‘zimga maksimal maqsad qo‘yganman va buning uchun harakat qildim. Bu futbol. Biz qo‘limizdan kelganicha sababini qildik. Nasib qilmadi. Lekin ko‘p narsa oldim va o‘rgandim, deb bemalol ayta olaman.

— «Andijon» klubidagi o‘zgarishlarni siz ham diqqat bilan kuzatib boryapsizmi? Fikringiz qanday?

— Albatta, kuzatib boryapman. Murabbiy jamoani maksimal kuchaytirish va o‘z taktikasiga to‘g‘ri keladigan saviyali o‘yinchilarni olish harakatida. Yaxshi futbolchilar olinyapti va hammasi yaxshi bo‘ladi.