Toshkentning «Lokomotiv» futbol klubi yangi mavsum oldidan tarkibini faol ravishda mustahkamlashda davom etmoqda. «Temiryo‘lchilar» jamoasi bir kunda to‘rt nafar yangi futbolchi bilan shartnoma imzoladi.

Avvalo, 22 yoshli darvozabon Nikita Shevchenko uch mavsumlik tanaffusdan so‘ng «Lokomotiv»ga qaytdi. U so‘nggi yillarda «Paxtakor» sharafini himoya qilgan bo‘lib, navbatdagi mavsumda yana "temiryo‘lchilar" safida harakat qiladi.

Shuningdek, 19 yoshli chap qanot himoyachisi Sherzodbek Abdulboriyev ham «Lokomotiv» a’zosiga aylandi. U o‘tgan mavsum «Navbahor»ning U-21 jamoasi tarkibida chempionatda 28 ta o‘yin o‘tkazib, 2 ta gol muallifi bo‘lgan. Abdulboriyev O‘zbekiston U-17 va U-20 terma jamoalari safida jami 25 ta uchrashuvda ishtirok etgan.

Yana bir yangi transfer — 22 yoshli markaziy yarim himoyachi Bilol To‘pliyev. U o‘tgan mavsum «Buxoro» tarkibida 37 ta o‘yinda maydonga tushib, 3 ta gol va 1 ta assist qayd etgan. 2026 yilda u «Lokomotiv» sharafini himoya qiladi.

Shuningdek, jamoa tarkibiga 27 yoshli o‘ng qanot vingeri Suhrob Nurullayev ham qo‘shildi. U o‘tgan mavsum «Nasaf» safida 24 ta o‘yin o‘tkazib, 2 ta gol urgan va yangi mavsum oldidan «Lokomotiv» bilan shartnoma imzoladi.