Тошкентнинг «Локомотив» футбол клуби янги мавсум олдидан таркибини фаол равишда мустаҳкамлашда давом этмоқда. «Темирйўлчилар» жамоаси бир кунда тўрт нафар янги футболчи билан шартнома имзолади.

Аввало, 22 ёшли дарвозабон Никита Шевченко уч мавсумлик танаффусдан сўнг «Локомотив»га қайтди. У сўнгги йилларда «Пахтакор» шарафини ҳимоя қилган бўлиб, навбатдаги мавсумда яна "темирйўлчилар" сафида ҳаракат қилади.

Шунингдек, 19 ёшли чап қанот ҳимоячиси Шерзодбек Абдулбориев ҳам «Локомотив» аъзосига айланди. У ўтган мавсум «Навбаҳор»нинг U-21 жамоаси таркибида чемпионатда 28 та ўйин ўтказиб, 2 та гол муаллифи бўлган. Абдулбориев Ўзбекистон U-17 ва U-20 терма жамоалари сафида жами 25 та учрашувда иштирок этган.

Яна бир янги трансфер — 22 ёшли марказий ярим ҳимоячи Билол Тўплиев. У ўтган мавсум «Бухоро» таркибида 37 та ўйинда майдонга тушиб, 3 та гол ва 1 та ассист қайд этган. 2026 йилда у «Локомотив» шарафини ҳимоя қилади.

Шунингдек, жамоа таркибига 27 ёшли ўнг қанот вингери Суҳроб Нуруллаев ҳам қўшилди. У ўтган мавсум «Насаф» сафида 24 та ўйин ўтказиб, 2 та гол урган ва янги мавсум олдидан «Локомотив» билан шартнома имзолади.