«Benfika» bosh murabbiyi Joze Mourinyu, agar London klubi tomonidan tegishli taklif bo‘lsa, «Chelsi»ni yana boshqarishga tayyor.

Portugaliyalik mutaxassis «Chelsi»ni o‘zining haqiqiy jamoasi deb hisoblaydi va «ko‘klar» bosh murabbiyi sifatida yana ishlashni istaydi. Bu haqda Indykaila News ijtimoiy tarmoq X orqali xabar bermoqda.

Shu bilan birga, manba ma’lumotlariga ko‘ra, «Chelsi» Mourinyuga nisbatan qiziqish bildirmasligi ham mumkin — londonliklarga zamonaviy qarashlarga ega murabbiy kerak.

Mourinyu «Chelsi»ni 2004–2007 hamda 2013–2015 yillar oralig‘ida boshqargan.

Joriy mavsumda APLda o‘tkazilgan 19 ta uchrashuvdan so‘ng londonliklar 30 ochko jamg‘arib, turnir jadvalida beshinchi o‘rinni egallab turibdi. «Chelsi» peshqadam «Arsenal»dan 15 ochko ortda qolmoqda.