Ertadan Turkiyaning Antaliya shahrida qishki o‘quv-mashg‘ulot yig‘inini boshlaydigan «Bunyodkor»ning nazorat uchrashuvlari doirasidagi dastlabki raqibi ma’lum bo‘ldi.

Ilyos Zeytullayev murabbiyligidagi jamoa 14 yanvar kuni Chexiya chempionatining 2-ligasi peshqadami — «Zbroyovka Brno»ga qarshi maydonga tushadi.

Daraja jihatidan O‘zbekiston Pro ligasiga teng keladigan Chexiya 2-ligasida 1-davra o‘yinlari yakunlandi. Raqib 16 ta jamoa qatnashadigan liganing birinchi davrasida 13 ta o‘yinda g‘alaba qozongan, 2 ta uchrashuvda durang qayd etgan va birgina bahsda mag‘lubiyatga uchrab, 41 ochko bilan yaqqol peshqadam bo‘lib turibdi.

Chexiyalik 51 yoshli mutaxassis Martin Shvedik murabbiylik qilayotgan «Zbroyovka Brno» safida asosan mahalliy futbolchilar to‘p suradi. Tarkibdagi o‘yinchilarning o‘rtacha yoshi 26,9 ni tashkil qiladi. Jamoaning Transfermarkt portalidagi umumiy bahosi — 5,96 million yevro.