«Manchester Siti» «Bornmut» vingeri Antuan Semenyoning transferini muvaffaqiyatli yakunladi. Bu haqda jurnalist va insayder Fabrisio Romano X ijtimoiy tarmog‘idagi sahifasida xabar berdi.
Manba ma’lumotlariga ko‘ra, transfer qiymati 75 mln yevro (65 mln funt)ni tashkil etadi. Qayd etilishicha, Semenyo payshanba, 8 yanvar kuni bo‘lib o‘tadigan tibbiy ko‘rikdan so‘ng uzoq muddatli shartnomaga imzo qo‘yadi.
Ta’kidlanishicha, ganalik vinger «shaharliklar» safiga qo‘shilish uchun APLning to‘rtta klubi taklifini rad etgan. Ushbu transferda futbolchining ispaniyalik mutaxassis Xosep Gvardiola qo‘l ostida to‘p surish istagi hal qiluvchi ahamiyat kasb etgan.
Angliya Premyer-ligasining joriy mavsumida 25 yoshli Antuan Semenyo 19 ta uchrashuvda maydonga tushib, 9 ta gol urib, 3 ta golli uzatmaga mualliflik qilgan.













