Xalqaro futbol assosiasiyalari federasiyalari (FIFA) 2026-yilgi Jahon chempionatida ofsaydni aniqlash tizimini yanada takomillashtiradi. Bu haqda FIFA prezidenti Janni Infantino The Guardian nashriga bergan intervyusida ma’lum qildi.

Yangi tizim doirasida FIFA barcha futbolchilarning sun’iy intellekt yordamida yaratilgan 3D nusxalarini ishlab chiqadi. Ushbu texnologiya yarim avtomatlashtirilgan ofsayd tizimiga futbolchilarning tana holatini aniqroq qayd etish imkonini beradi.

“Bu ofsaydni yarim avtomatik aniqlash texnologiyasi — oldinga tashlangan katta qadam. Tizim yanada sifatli tasvirlar, tezkor qarorlar va vaziyatni hammaga tushunarli tarzda ko‘rsatishni ta’minlaydi”, dedi Infantino.

Avvalroq Xalqaro futbol assosiasiyalari kengashi (IFAB) 2026 yil 20 yanvar kuni ofsayd qoidalariga o‘zgartirish kiritish masalasini ko‘rib chiqishi xabar qilingan edi. Agar o‘zgarishlar ma’qullansa, yangi qoidalar 2026/27-yilgi mavsumdan boshlab kuchga kirishi mumkin.

Hozirgi qoidalarga ko‘ra, hujumchi futbolchining gol urish mumkin bo‘lgan istalgan tana qismi uzatma vaqtida raqib darvozasiga so‘nggi himoyachidan (darvozabonni ham qo‘shgan holda) yaqinroq bo‘lsa, ofsayd qayd etiladi. FIFA’ning global futbol rivoji bo‘yicha rahbari, “Arsenal”ning sobiq bosh murabbiyi Arsen Venger esa boshqa taklif bilan chiqqan: agar hujumchining gol urish mumkin bo‘lgan tana qismi so‘nggi himoyachi bilan bir chiziqda yoki undan orqaroqda bo‘lsa, bunday holat ofsayd hisoblanmasligi kerak.

Ma’lumot uchun, 2026-yilgi jahon chempionati 11 iyundan 19 iyulgacha Kanada, Meksika va AQSH maydonlarida bo‘lib o‘tadi. Musobaqada ilk bor 48 ta terma jamoa ishtirok etadi.