Londonning “Arsenal” klubi “Nyukasl Yunayted”ning o‘ng qanot himoyachisi Valentino Livramentoga jiddiy qiziqish bildirmoqda. Mikel Arteta jamoasi 23 yoshli futbolchini 2026-yilning yozida sotib olish imkoniyatini ko‘rib chiqmoqda. Bu haqda The Sun nashri xabar berdi.

Manbaga ko‘ra, “kanonirlar” Livramento uchun kurashda “Manchester Siti” bilan raqobatga duch kelishi mumkin. Qayd etilishicha, “shaharliklar” ingliz futbolchisiga uzoq vaqtdan beri qiziqish bildirib keladi. O‘tgan mavsumda “Nyukasl” himoyachini boshqa klubga sotish uchun kamida 60 million funt sterling (69 million yevro) so‘ragan.

“Nyukasl” rahbariyati esa futbolchini jamoada saqlab qolish uchun uni eng yuqori maosh oluvchi futbolchilardan biriga aylantirishni rejalashtirmoqda. Klub Livramentoga olti yillik yangi shartnoma taklif etmoqchi. Hozirda jamoaning eng ko‘p maosh oladigan futbolchisi — yillik daromadi qariyb 10 million yevroga teng bo‘lgan braziliyalik yarim himoyachi Bruno Gimarayesh hisoblanadi.

Ma’lumot uchun, joriy mavsumda Livramento “Nyukasl” safida jami 18 ta uchrashuvda maydonga tushib, bitta golli uzatma muallifiga aylangan. Futbolchining klub bilan shartnomasi 2028 yil yozigacha amal qiladi. Transfermarkt portaliga ko‘ra, Valentinoning bozor qiymati 40 million yevroni tashkil etadi.