Madridning «Real» jamoasi sardori va himoyachisi Daniel Karvaxal «qaymoqranglilar» futbolchilari jamoa bosh murabbiyi Xabi Alonsoni to‘liq qo‘llab-quvvatlayotganini ma’lum qildi. Ilgariroq OAVda «Qirollik klubi»ning ayrim o‘yinchilari ispaniyalik mutaxassisning ish uslubidan norozi ekani haqida xabarlar tarqalgan edi.

«Biz barchamiz Xabi Alonsoni 100 foiz qo‘llab-quvvatlaymiz. U xotirjam, uning g‘oyalari o‘zgarmas va tushunarli. Natijalar yomon bo‘lsa, har doim mish-mishlar paydo bo‘ladi, ammo biz, albatta, Xabining tarafdamiz», — dedi Karvaxal matbuot anjumanida.

Ispaniyalik mutaxassis o‘tgan yozda «Real» bosh murabbiyi lavozimiga tayinlangan edi. La Liganing 19 turidan so‘ng «qaymoqranglilar» 45 ochko jamg‘arib, turnir jadvalida ikkinchi o‘rinni egallab turibdi.