Мадриднинг «Реал» жамоаси сардори ва ҳимоячиси Даниэль Карвахаль «қаймоқранглилар» футболчилари жамоа бош мураббийи Хаби Алонсони тўлиқ қўллаб-қувватлаётганини маълум қилди. Илгарироқ ОАВда «Қироллик клуби»нинг айрим ўйинчилари испаниялик мутахассиснинг иш услубидан норози экани ҳақида хабарлар тарқалган эди.

«Биз барчамиз Хаби Алонсони 100 фоиз қўллаб-қувватлаймиз. У хотиржам, унинг ғоялари ўзгармас ва тушунарли. Натижалар ёмон бўлса, ҳар доим миш-мишлар пайдо бўлади, аммо биз, албатта, Хабининг тарафдамиз», — деди Карвахаль матбуот анжуманида.

Испаниялик мутахассис ўтган ёзда «Реал» бош мураббийи лавозимига тайинланган эди. Ла Лиганинг 19 туридан сўнг «қаймоқранглилар» 45 очко жамғариб, турнир жадвалида иккинчи ўринни эгаллаб турибди.