"Manchester Yunayted" futbolchilari jamoa yarim himoyachisi va sardori Brunu Fernandesh klubdagi "tartibsizlik"dan charchagan va kelasi yozda uni tark etishga tayyor, deb hisoblamoqda. Bu haqda The Sun xabar bermoqda.

Manbaga ko‘ra, portugaliyalik xavbekning jamoadoshlari uning istagiga to‘g‘ri munosabatda bo‘lishmoqda. Ta’kidlanishicha, Fernandesh 2020 yilda "qizil iblislar" safiga o‘tganidan buyon doim borini berib o‘ynagan va mankunianliklarning eng yaxshi futbolchisi bo‘lgan. Shu bilan birga, yarim himoyachi "Manchester Yunayted"ning yangi boshqaruv modeli tufayli o‘zini aldangandek his qilmoqda. Bundan tashqari, Amorimning ishdan bo‘shatilishi futbolchining faoliyatini "Old Trafford"da davom ettirish istagini kuchaytirmadi.

"Manchester Yunayted" safida Fernandesh barcha musobaqalarda 309 ta o‘yin o‘tkazib, 103 ta gol urgan va 94 ta golli uzatmani amalga oshirgan. Futbolchining klub bilan amaldagi mehnat shartnomasi 2027 yilning yoziga qadar mo‘ljallangan. Transfermarkt portalida keltirilgan ma’lumotlarga ko‘ra, futbolchining bozor narxi 40 mln yevroni tashkil etadi.