«Liverpul» jamoasi bosh murabbiyi Arne Slot Angliya Kubogining 3-bosqichida «Barnsli» ustidan qozonilgan 4:1 hisobidagi g‘alaba haqida fikr bildirdi.

O‘yin haqida:

«Urgan gollarimizdan qoniqdim — ular juda chiroyli chiqdi. Lekin o‘yin keragidan ortiq vaqt davomida juda keskin bo‘lib qoldi, deb o‘ylayman. Chunki 2:0 hisobida oldinda borayotgan paytimizda o‘tkazib yuborilgan gol oxirgi 5–10 daqiqagacha o‘yinni biz uchun qiyinlashtirdi. Shunday ekan, ha — chiroyli gollar bo‘ldi, ammo to‘pga egalik qilgan holda yaratilgan vaziyatlar yetarli emas edi».

Soboslaining xatosi haqida:

«Menimcha, bunday harakatni Angliya Kubogi yoki Angliya Ligasi Kubogi o‘yinida ham, o‘rtoqlik uchrashuvida ham, hatto mashg‘ulotda ham qilish to‘g‘ri emas. Bu juda g‘alati qaror, va mening ham bu borada o‘z fikrim bor, ammo uni o‘zimda qoldirib, Dominik bilan alohida muhokama qilishni afzal ko‘raman».

Zaxiradan maydonga tushgan Virtsning o‘yini haqida:

«U yarim soatga yaqin maydonga tushib, gol urdi, golli uzatma berdi va yana bir nechta yaxshi vaziyatlar yaratdi. Albatta, u jamoaga ijodkorlik olib kirganini aytish mumkin. Bugun bizga aynan shu kerak edi», — dedi Slot.