Madridning «Real» klubida ishdan bo‘shatilgan Xabi Alonso o‘rnini egallagan ispaniyalik mutaxassis Alvaro Arbeloaning murabbiylar shtabi rasman e’lon qilindi. Olti nafar murabbiydan to‘rt nafari avval «qirol klubi»ning yoshlar jamoasida sobiq himoyachi bilan birga ishlagan.
«Madrid»ning rasmiy saytida keltirilgan ma’lumotlarga ko‘ra, Arbeloaning yordamchilari etib Xulian Karmona, Kevin Kardeyro va Rikardo da Silva tayinlandi (ularning barchasi murabbiy bilan «Kastilya»da ishlagan, so‘nggisi jismoniy tayyorgarlik uchun javobgar bo‘lgan).
Shuningdek, texnik tahlilchi lavozimiga Frensis Sanches tayinlandi — u ham madridliklarning yoshlar jamoasida faoliyat yuritgan. Jismoniy tayyorgarlik bo‘yicha murabbiy sifatida Antonio Pintus qaytdi, u bu vazifani Alonso kelgunga qadar bajarib kelgan. Darvozabonlar murabbiyi etib esa Luis Llopis tayinlandi.
