Мадриднинг «Реал» клубида ишдан бўшатилган Хаби Алонсо ўрнини эгаллаган испаниялик мутахассис Алваро Арбелоанинг мураббийлар штаби расман эълон қилинди. Олти нафар мураббийдан тўрт нафари аввал «қирол клуби»нинг ёшлар жамоасида собиқ ҳимоячи билан бирга ишлаган.
«Мадрид»нинг расмий сайтида келтирилган маълумотларга кўра, Арбелоанинг ёрдамчилари этиб Хулиан Кармона, Кевин Кардейро ва Рикардо да Силва тайинланди (уларнинг барчаси мураббий билан «Кастилья»да ишлаган, сўнггиси жисмоний тайёргарлик учун жавобгар бўлган).
Шунингдек, техник таҳлилчи лавозимига Фрэнсис Санчес тайинланди — у ҳам мадридликларнинг ёшлар жамоасида фаолият юритган. Жисмоний тайёргарлик бўйича мураббий сифатида Антонио Пинтус қайтди, у бу вазифани Алонсо келгунга қадар бажариб келган. Дарвозабонлар мураббийи этиб эса Луис Ллопис тайинланди.
