Misr terma jamoasi bosh murabbiyi Husam Hasan Afrika Kubogi yarim finalidan o‘rin olgan Senegalga qarshi o‘yin oldidan o‘z fikrlarini bildirib o‘tdi.
Uchrashuv 14 yanvar kuni bo‘lib o‘tadi va Toshkent vaqti bilan soat 22:00 da boshlanadi.
"Senegal Misr terma jamoasi uchun noqulay jamoa emas. Biz Afrikaning yetti karra chempionimiz va futbolda noqulay jamoa degan tushuncha yo‘q. Biz bilan uchrashgan har qanday inson yuragida qo‘rquv bilan o‘ynaydi, provokasion videolar esa faqat o‘yinlar oldidan bizni ruhlantiradi," - deya murabbiyning so‘zlarini keltiradi CAF Online.
"Ushbu yarim finalga raqibga katta hurmat bilan, shu bilan birga katta tayyorgarlik bilan yondashyapmiz. Ruhan biz tayyormiz. Biz to‘qnash keladigan jamoani bilamiz, kuchli tomonlarimizni ham bilamiz. Har bir jamoaning o‘z o‘yin uslubi, o‘z strategiyasi bor, biz shunga yarasha tayyorgarlik ko‘rdik," - deya qo‘shimcha qildi Hasan.
