Marokash Qirollik futbol federasiyasi Afrika Millatlar kubogi finalida Senegal terma jamoasiga qarshi uchrashuvda (0:1) mag‘lubiyatga uchragach, rasmiy bayonot e’lon qildi.

Uchrashuv davomida Senegal darvozasiga penalti belgilanganidan so‘ng raqib jamoa futbolchilari hakam qaroriga norozilik bildirib, maydonni tark etishdi. Penalti 90+24-daqiqada ijro etildi. Senegal darvozaboni Eduar Mendi marokashlik hujumchi Brahim Diasning “panenka” uslubidagi zarbasini qaytardi.

“Marokash Qirollik futbol federasiyasi Senegal terma jamoasining final uchrashuvida o‘yinni davom ettirishdan bosh tortgani hamda hakam tomonidan penalti belgilanganidan keyin yuz bergan voqealar munosabati bilan Afrika Futbol Konfederasiyasi (AFK) va FIFA ustidan sudga murojaat qilish niyatida ekanini e’lon qiladi. Mutaxassislar ushbu penalti qarorini to‘g‘ri deb baholagan. Mazkur holat uchrashuv borishiga va futbolchilarning o‘yiniga sezilarli ta’sir ko‘rsatdi”, deyiladi Marokash futbol federasiyasi bayonotida.

Shu bilan birga, Marokash futbol federasiyasi milliy terma jamoani barcha o‘yinlarda namunali tarzda qo‘llab-quvvatlab kelgan, sadoqatini namoyon etgan barcha marokashlik muxlislarga chuqur minnatdorlik bildirdi.

Ma’lumot uchun, 2026-yilgi Afrika Millatlar kubogi finalida Senegal va Marokash terma jamoalari o‘zaro to‘qnash keldi. Asosiy vaqtga qo‘shib berilgan daqiqalarda hakam Senegalning golini inobatga olmadi, shundan so‘ng esa Senegal darvozasiga penalti belgiladi. Bunga norozilik sifatida “Teranga sherlari” murabbiylar shtabi jamoani maydondan olib chiqib ketdi. Biroq keyinchalik Senegal yana maydonga qaytdi. Marokash penalti zarbasini golga aylantira olmadi va birinchi qo‘shimcha bo‘limning dastlabki daqiqalarida senegalliklar g‘alaba golini urishdi — 1:0.