"Real" bosh murabbiyi Alvaro Arbeloa Chempionlar ligasi doirasida "Monako"ga qarshi o‘yin oldidan jamoa yaxshi holatda ekanini ta’kidladi.
O‘tgan hafta davomida madridliklar Ispaniya Superkubogi finalida "Barselona"ga mag‘lub bo‘ldi, mamlakat Kubogidan "Albasete"ga yutqazib chiqib ketdi hamda La Liganing autsayderi "Levante"ni qiyinchilik bilan mag‘lub etdi.
Kataloniyaliklarga qarshi mag‘lubiyatdan keyin jamoani Xabi Alonso tark etdi va uning o‘rnini Arbeloa egalladi.
"Jamoa yaxshi holatda. Futbolchilar o‘ynashni juda istayapti. Shanba kuni qo‘lga kiritilgan g‘alaba bizga qo‘shimcha turtki berdi", — deya mutaxassis so‘zlarini keltirdi UYEFA matbuot xizmati.
Uchrashuv Toshkent vaqti bilan soat 01:00 da boshlanadi. Olti turdan so‘ng "Real" 12 ochko bilan turnir jadvalida 7-o‘rinni egallab turibdi. "Monako" hisobida 9 ochko bo‘lib, jamoa 19-pog‘onada joylashgan.













