Madridning “Real” klubi hujumchisi Vinisius Junior UEFA Chempionlar Ligasi tarixida braziliyalik futbolchilar orasida ikkinchi eng yaxshi to‘purarga aylandi.

Bu natija 20 yanvar kuni musobaqaning 7-turi doirasidagi uchrashuvda qayd etildi. Unda “Real” o‘z maydonida “Monako”ni 6:1 hisobida mag‘lub etdi. Mazkur bahsda 25 yoshli hujumchi jamoasining beshinchi goliga mualliflik qildi.

Ushbu gol Vinisius uchun Chempionlar Ligasidagi 30-gol bo‘lib, shu orqali u Kaka bilan tenglashdi. Biroq Kaka bu natijaga 86 ta uchrashuvda erishgan bo‘lsa, Vinisiusga 75 ta o‘yin kifoya qildi.

Braziliyalik futbolchilar orasida ushbu turnirdagi eng yaxshi natija Neymarga tegishli bo‘lib, u “PSJ” va “Barselona” safida UEFA Chempionlar Ligasi doirasida 43 ta gol kiritishga muvaffaq bo‘lgan.

Chempionlar Ligasida Braziliya terma jamoasi futbolchilari orasidagi eng yaxshi to‘purarlar uchligi:

43 ta gol — Neymar (“Barselona”, “PSJ”)
30 ta gol — Vinisius Junior (“Real”)
30 ta gol — Kaka (“Milan”, “Real”)

Joriy mavsumda Vinisius “Real Madrid” safida 30 ta uchrashuvda maydonga tushib, 7 ta gol urdi va 11 ta golli uzatma amalga oshirdi. Transfermarkt ma’lumotlariga ko‘ra, uning bozor qiymati 150 million yevroni tashkil etadi.