Мадриднинг “Реал” клуби ҳужумчиси Винисиус Жуниор УЕФА Чемпионлар Лигаси тарихида бразилиялик футболчилар орасида иккинчи энг яхши тўпурарга айланди.

Бу натижа 20 январь куни мусобақанинг 7-тури доирасидаги учрашувда қайд этилди. Унда “Реал” ўз майдонида “Монако”ни 6:1 ҳисобида мағлуб этди. Мазкур баҳсда 25 ёшли ҳужумчи жамоасининг бешинчи голига муаллифлик қилди.

Ушбу гол Винисиус учун Чемпионлар Лигасидаги 30-гол бўлиб, шу орқали у Кака билан тенглашди. Бироқ Кака бу натижага 86 та учрашувда эришган бўлса, Винисиусга 75 та ўйин кифоя қилди.

Бразилиялик футболчилар орасида ушбу турнирдаги энг яхши натижа Неймарга тегишли бўлиб, у “ПСЖ” ва “Барселона” сафида УЕФА Чемпионлар Лигаси доирасида 43 та гол киритишга муваффақ бўлган.

Чемпионлар Лигасида Бразилия терма жамоаси футболчилари орасидаги энг яхши тўпурарлар учлиги:

43 та гол — Неймар (“Барселона”, “ПСЖ”)
30 та гол — Винисиус Жуниор (“Реал”)
30 та гол — Кака (“Милан”, “Реал”)

Жорий мавсумда Винисиус “Реал Мадрид” сафида 30 та учрашувда майдонга тушиб, 7 та гол урди ва 11 та голли узатма амалга оширди. Transfermarkt маълумотларига кўра, унинг бозор қиймати 150 миллион еврони ташкил этади.