Kecha oqshom O‘zbekiston milliy terma jamoasi Osiyo kubogi–2026 musobaqasida Vatanimiz sharafini himoya etish uchun Indoneziya poytaxti Jakarta shahriga uchib ketdi. Parvoz Toshkent — Kuala-Lumpur — Jakarta yo‘nalishi bo‘ylab davom etmoqda. Indoneziyaga yo‘l oladigan ro‘yxatdan 14 nafar futbolchi o‘rin oldi, ulardan ikki nafari darvozabon. Shuningdek, Osiyo Futbol Konfederasiyasi (OFK) musobaqa boshlanguniga qadar jamoalarga yana bir nafar o‘yinchini almashtirish imkoniyatini berishini ham eslatib o‘tamiz.

Qit’a chempionatiga terma jamoamizning yangilangan murabbiylar shtabi bir yil davomida puxta hozirlik ko‘rdi. Bu davr mobaynida futzalchilarimiz Osiyo kubogi saralash bosqichidan muvaffaqiyatli o‘tishdi. Saudiya Arabistonida bo‘lib o‘tgan Islom birdamligi o‘yinlarida sovrindorlar qatoridan joy olishdi. Shuningdek, jahonning TOP jamoalariga qarshi o‘tkazilgan xalqaro o‘rtoqlik uchrashuvlarida irodali g‘alabalari bilan muxlislarni xursand qilishdi.

Biroq hamma ish ham silliq kechdi, deb bo‘lmaydi. Terma jamoa murabbiylarini eng ko‘p tashvishga solgan muammo — bu jarohatlar bo‘ldi. 2025 yilning birinchi yarmida mavsumni zo‘r boshlagan Behruz Samiyev jiddiy shikastlanib, uzoq muddatga safdan chiqdi. Terma jamoa yetakchisi Husniddin Nishonov jarrohlik amaliyotini o‘tkazdi. Shundan so‘ng terma jamoa darvozabonlari Abbosbek Elmurodov va Abbos O‘lmasbekov ham jarohat sababli davolanishga majbur bo‘lishdi. Bundan tashqari, Davlat Ibragimov, Muzaffar Axadjonov, Shahzod Sadiyev, Artur Umurov, Mashrab Odilov hamda Muhammadali Xusanboyevlarni ham turli darajadagi jarohatlar bezovta qildi. Davron Choriyev esa Jahon chempionati arafasida olgan jarohatidan endi davolanib, mashg‘ulotlarga qaytdi.

Shu bois Jakartaga yo‘l olgan yakuniy tarkibni aniqlash jarayoni murabbiylar shtabi uchun oson kechmadi. Quvaytga qarshi o‘tkazilgan so‘nggi nazorat uchrashuvidan keyingina yakuniy tarkib bo‘yicha bir to‘xtamga kelindi. Murabbiylar shtabi xulosasiga ko‘ra, milliy chempionatning 6-turida olgan jarohatlaridan to‘liq forig‘ bo‘lmagan Muhammadali Xusanboyev, Mashrab Odilov, Shahzod Sadiyev, Davlat Ibragimov va Abbos O‘lmasbekov ushbu Osiyo kubogida ishtirok etmaydigan bo‘ldi.

O‘zbekiston milliy terma jamoasi Jakarta shahrida Osiyo kubogi boshlanguniga qadar mahalliy klublarga qarshi yana ikkita nazorat uchrashuvi o‘tkazilishi rejalashtirilgan.

Fursatdan foydalanib, minglab futzal ishqibozlari nomidan milliy terma jamoamizga Osiyo kubogi–2026 musobaqasida omad va zafarlar tilaymiz!