Braziliya terma jamoasi bosh murabbiyi Karlo Anchelotti Braziliya futbol konfederasiyasi bilan shartnomani 2030 yilgi jahon chempionatiga qadar uzaytirish bo‘yicha og‘zaki kelishuvga erishdi, deb xabar beradi Globo.

Manbaga ko‘ra, tomonlar yangi kelishuv shartlarini allaqachon kelishib olgan. Ta’tildan so‘ng 22 yanvar kuni Rio-de-Janeyroga keladigan Anchelotti fevral oyining dastlabki haftalarida shartnoma imzolashi kutilmoqda.

Muddatni uzaytirish bo‘yicha muzokaralar oktyabr oyida boshlangan va yil oxirigacha davom etgan. Yangi shartnoma ham xuddi shunday moliyaviy shartlar asosida tuziladi: terma jamoalar murabbiylari orasida allaqachon dunyodagi eng yuqori maoshni (taxminan 10 million yevro) olayotgan Anchelotti sport maqsadlariga erishish uchun bonus qismini o‘zgartirgan holda maoshini saqlab qoladi.

Avvalroq The Touchline portali Anchelotti kelajakda "Real" bosh murabbiyligiga qaytishga tayyorligini ma’lum qilgani haqida xabar bergandi. Biroq Braziliya bilan tuzilgan yangi kelishuv tomonlarning hamkorlikda ishlash bo‘yicha uzoq muddatli rejalarini tasdiqlaydi, deb yozadi Globo.