Bugun Sport, Iqtisodiyot va moliya vazirliklari hamda Milliy Olimpiya qo‘mitasi rahbariyati ishtirokida sport federasiyalari va assosiasiyalari mas’ullari bilan kengaytirilgan yig‘ilish o‘tkazildi.

Unda joriy yilda o‘tkazilishi rejalashtirilgan yirik kompleks musobaqalarga tayyorgarlik jarayonlari, shuningdek, 26 yanvar kuni mamlakatimizda ilk bor tashkil etiladigan Osiyo Olimpiya kengashining 46-Bosh Assambleyasiga puxta hozirlik ko‘rish masalalari atroflicha muhokama qilindi.

Dastlab, sport federasiyalari va assosiasiyalarini belgilangan talabnomalar asosida moliyalashtirish, ajratilayotgan byudjet mablag‘laridan maqsadli va samarali foydalanish, shuningdek, mazkur jarayonlar ustidan nazoratni kuchaytirish masalalariga alohida e’tibor qaratildi.

Shu bilan birga, yurtimizda ilk marotaba o‘tkazilayotgan Osiyo Olimpiya kengashi Bosh Assambleyasini yuqori saviyada tashkil etish, tashrif buyuradigan yuqori martabali mehmonlarni munosib kutib olish, tashkiliy, axborot va xavfsizlik masalalarini muvofiqlashtirilgan holda amalga oshirish bo‘yicha qator muhim vazifalar belgilab olindi.