"Surxon" matbuot-kotibi Evdokim Raimov Serbiyaning Eurasia.Football saytiga "Baltika"ga qarshi bo‘lib o‘tgan uchrashuv haqida hamda Superliga bo‘yicha qisqa intervyu berdi.

«Baltika"ga qarshi o‘yin biz uchun strategik nuqtayi nazardan juda muhim edi. Jamoamiz biroz yangilandi, biroq hanuz Superligadagi eng yosh tarkibga ega. Shu sababli RPLda medallar uchun kurashayotgan bunday kuchli sparring-hamkor bilan o‘ynash juda muhim edi.

Ta’kidlash joizki, ob-havo ham bizga, ham raqibga hujumkor futbol ko‘rsatish imkonini berdi. Turkiyadagi yig‘inlarda ko‘plab o‘zbek klublari uzoq davom etgan yomg‘irlardan shikoyat qilishdi, natijada biz ham bir necha mashg‘ulotni trenajyor zaliga ko‘chirishga majbur bo‘ldik. Ammo umuman olganda, o‘yin yakunlariga ko‘ra biz uchun zarur bo‘lgan barcha ma’lumotni oldik. Albatta, bunday kuchli raqibni mag‘lub etish yoqimli. Ayniqsa, Abdullajonov va Sherbo‘tayevning jarima zarbalaridan urgan gollari juda chiroyli chiqdi. Biroq boshqa tomondan, bu sparring uchrashuvi ekanini ham unutmaslik kerak. Bu yerda asosiy jihat — yangi futbolchilar hamda o‘yin amaliyoti yetishmayotgan futbolchilarga o‘zini maydonda ko‘rsatish imkoniyati bo‘ldi.

Barcha ijobiy va salbiy jihatlarni inobatga olgan holda shuni aytish mumkinki, so‘nggi ikki-uch mavsumda O‘zbekiston chempionatida raqobat keskin kuchaydi. Turnir jadvalining barcha qismida kurash oxirigacha davom etmoqda. Farg‘onaning «Neftchi», Toshkentning «Paxtakor», Qarshining «Nasaf»i va yana qator klublar transferlar borasida ma’lum darajada “qurollanish poygasi”ga qo‘shildi va endilikda deyarli har bir jamoa tarkibida malakali futbolchilar mavjud. Samarqandning «Dinamo»si, OKMK, «Navbahor»ga qarang — umuman olganda, barcha jamoalar chempionat yetakchilaridan ochko tortib olishi mumkin. Shu jihatdan Superliga nihoyatda qiziqarli va raqobatbardosh bo‘lib qoldi».