«Lion» futbol klubi qishda «Real»dan ijara asosida jamoaga qo‘shilgan braziliyalik hujumchi Endrikni saqlab qolish niyatida. ESPN ma’lumotlariga ko‘ra, klub Endrikning ijara shartnomasini uzaytirish ustida ish olib bormoqda. Bosh murabbiy Paulu Fonseka rahbariyatni futbolchining jamoada yanada uzoqroq qolishi uchun barcha imkoniyatlarni ishga solishga chaqirmoqda.

Ayni paytga kelib, Endrik «Lion» safida uchta uchrashuvda maydonga tushib, to‘rtta gol urdi va bitta golli uzatma amalga oshirdi. So‘nggi bahsda u xet-trik qayd etib, jamoaning 5:2 hisobidagi g‘alabasiga hissa qo‘shdi. Klublar o‘rtasidagi ijara shartnomasi 2026 yil iyunigacha amal qiladi, «Lion» esa futbolchining maoshining 50 foizini to‘lab beradi.

Qayd etilishicha, «Lion»da Endrikni to‘liq sotib olish huquqi mavjud emas. Bu esa ijara muddati tugagach, futbolchi «Real»ga qaytishi kerakligini anglatadi. Hozirda klublar ijarani uzaytirish imkoniyati yuzasidan muzokaralarni davom ettirmoqda, biroq yakuniy qaror hali qabul qilinmagan.