«Лион» футбол клуби қишда «Реал»дан ижара асосида жамоага қўшилган бразилиялик ҳужумчи Эндрикни сақлаб қолиш ниятида. ESPN маълумотларига кўра, клуб Эндрикнинг ижара шартномасини узайтириш устида иш олиб бормоқда. Бош мураббий Паулу Фонсека раҳбариятни футболчининг жамоада янада узоқроқ қолиши учун барча имкониятларни ишга солишга чақирмоқда.

Айни пайтга келиб, Эндрик «Лион» сафида учта учрашувда майдонга тушиб, тўртта гол урди ва битта голли узатма амалга оширди. Сўнгги баҳсда у хет-трик қайд этиб, жамоанинг 5:2 ҳисобидаги ғалабасига ҳисса қўшди. Клублар ўртасидаги ижара шартномаси 2026 йил июнигача амал қилади, «Лион» эса футболчининг маошининг 50 фоизини тўлаб беради.

Қайд этилишича, «Лион»да Эндрикни тўлиқ сотиб олиш ҳуқуқи мавжуд эмас. Бу эса ижара муддати тугагач, футболчи «Реал»га қайтиши кераклигини англатади. Ҳозирда клублар ижарани узайтириш имконияти юзасидан музокараларни давом эттирмоқда, бироқ якуний қарор ҳали қабул қилинмаган.