Braziliya 2029 yil bo‘ladigan Klublar o‘rtasidagi Jahon chempionatini o‘z hududida o‘tkazish uchun Xalqaro futbol federasiyasiga (FIFA) rasmiy murojaat bilan chiqdi. Bu haqda ESPN nashri xabar bermoqda.

Manbaga ko‘ra, mazkur tashabbus Braziliyada bo‘lib o‘tgan uchrashuv chog‘ida ilgari surilgan. Unda FIFA prezidenti Janni Infantino, Braziliya prezidenti Luis Inasiu Lula da Silva, milliy terma jamoa bosh murabbiyi Karlo Anchelotti hamda Braziliya futbol konfederasiyasi (CBF) rahbari Samir Shauda ishtirok etgan. Qayd etilishicha, Infantino bir necha kundan beri Braziliyada bo‘lib turibdi. Uning tashrifi 2027-yilda Braziliyada o‘tkaziladigan ayollar o‘rtasidagi futbol bo‘yicha Jahon chempionatini targ‘ib qilish tadbirlari bilan bog‘liq.

Braziliya futbol konfederasiyasi (CBF) bir necha oydan buyon klublar o‘rtasidagi Jahon chempionatini mamlakatda o‘tkazish bo‘yicha yopiq tarzda muzokara o‘tkazmoqda.

“Mezbonlik masalasi juda yaqin. Albatta, barcha jihatlarni muhokama qilish kerak. Agar barchasi bizga bog‘liq bo‘lsa, Klublar o‘rtasidagi Jahon chempionatini Braziliyada o‘tkazamiz”,  deydi Braziliya futbol konfederasiyasi prezidenti.

Ma’lumot o‘rnida, FIFA 2025-yilgi Klublar o‘rtasidagi Jahon chempionati bo‘yicha alohida tanlov jarayonini o‘tkazmagan. Kengaytirilgan, 32 jamoa ishtirok etadigan turnirni o‘tkazish huquqi FIFA Kengashi qarori bilan bir ovozdan AQSHga berilgan. 2029-yilgi musobaqa mezbonini aniqlash jarayoni qanday bo‘lishi hozircha e’lon qilinmagan.