"Chelsi"ning argentinalik yarim himoyachisi Enso Fernandes klub bilan yaxshilangan shartlar asosida qayta shartnoma imzolamoqchi. Bu haqda jurnalist Nizaar Kinsella xabar bermoqda.

Manba ma’lumotiga ko‘ra, Enso jamoaning so‘nggi o‘yinlari yangi shartnoma muhokamasini oqlaydi, deb hisoblaydigan bir necha futbolchilaridan biri hisoblanadi. Agentlar almashganidan so‘ng, Ensoning yangi vakillari "Chelsi" rahbariyatiga sharoitlarni yaxshilash bo‘yicha muzokaralarni boshlash istagida ekanliklarini bildirishdi.

"Chelsi" Enso Fernandesni 2023 yilda "Benfika"dan 121 million yevro evaziga sotib olgandi. Joriy mavsumda 25 yoshli xavbek barcha musobaqalarda 34 ta uchrashuvda maydonga tushib, o‘nta gol urdi va to‘rtta assist muallifi bo‘ldi.

Yarim himoyachining "Chelsi" bilan amaldagi mehnat shartnomasi 2032 yil yozigacha mo‘ljallangan.