OKMK futbol klubi yangi mavsum oldidan rejalashtirilgan dastlabki xorij yig‘inini muvaffaqiyatli tarzda yakunlab, bugun Toshkentga qaytib keldi. Jamoa 18–31 yanvar kunlari Birlashgan Arab Amirliklarida bo‘lib, u yerda jismoniy holatni yaxshilash va taktik ishlanmalarni chuqurlashtirishga qaratilgan mashg‘ulotlar olib bordi.
Yig‘in davomida murabbiylar shtabi futbolchilarning umumiy tayyorgarligini baholab, jamoaviy o‘yin mexanizmlarini takomillashtirish hamda yangi taktika elementlarini amaliyotda sinab ko‘rishga alohida e’tibor qaratdi. Mashg‘ulotlar yuqori intensivlikda o‘tdi va futbolchilarning funsional holatini optimal darajaga olib chiqish asosiy maqsadlardan biri bo‘ldi.
Ikki haftalik intensiv mashg‘ulotlardan so‘ng jamoa a’zolariga uch kunlik qisqa tanaffus berildi. Shundan so‘ng OKMK FK tayyorgarlikning navbatdagi muhim bosqichiga kirishadi. Xususan, 4 fevral kuni erta tongda jamoa Turkiyaning Antaliya shahriga yo‘l oladi.
Antaliyadagi yig‘in 18 fevralga qadar davom etadi. Ushbu bosqich doirasida «Konchilar» bir qator nazorat uchrashuvlarini o‘tkazishi rejalashtirilgan bo‘lib, mazkur bellashuvlar yangi mavsum oldidan jamoaning umumiy tayyorgarlik darajasi hamda tarkib imkoniyatlarini baholashda muhim ahamiyat kasb etadi. Raqiblar va o‘yinlar taqvimi bo‘yicha batafsil ma’lumotlar yaqin kunlarda e’lon qilinadi.
