O‘zbekiston futzal terma jamoasi Osiyo kubogi “C” guruhi 3-turida Yaponiya terma jamoasiga qarshi maydonga tushdi. “Indonesia Arena” majmuasida bo‘lib o‘tgan uchrashuvda Nodir Eliboyev boshchiligidagi jamoa 1:2 hisobida mag‘lubiyatga uchradi.
Uchrashuvdagi hisobni O‘zbekiston terma jamoasi ochdi. 8-daqiqada Shahram Fahriddinov yaponiyaliklar darvozasini ishg‘ol qilib, jamoasini hisobda oldinga olib chiqdi. Ikkinchi bo‘limning 30-daqiqasida hisob tenglashdi. Gol muallifi — Shoto Yamanaka. Oradan 7 daqiqa o‘tib, Yamanaka yana bir bor O‘zbekiston darvozasini ishg‘ol qilib, Yaponiya terma jamoasining g‘alabasiga hissa qo‘shdi.
Qolgan daqiqalarda hisob o‘zgarmadi. Shu tariqa, Yaponiya 3-turda ham g‘alaba qozonib, 9 ochko jamg‘argan holda pley-off bosqichiga yo‘l oldi. O‘zbekiston terma jamoasi esa 4 ochko bilan guruhda ikkinchi o‘rinni egalladi.
