Ўзбекистон футзал терма жамоаси Осиё кубоги “C” гуруҳи 3-турида Япония терма жамоасига қарши майдонга тушди. “Индонесиа Арена” мажмуасида бўлиб ўтган учрашувда Нодир Элибоев бошчилигидаги жамоа 1:2 ҳисобида мағлубиятга учради.

Учрашувдаги ҳисобни Ўзбекистон терма жамоаси очди. 8-дақиқада Шаҳрам Фаҳриддинов японияликлар дарвозасини ишғол қилиб, жамоасини ҳисобда олдинга олиб чиқди. Иккинчи бўлимнинг 30-дақиқасида ҳисоб тенглашди. Гол муаллифи — Шото Яманака. Орадан 7 дақиқа ўтиб, Яманака яна бир бор Ўзбекистон дарвозасини ишғол қилиб, Япония терма жамоасининг ғалабасига ҳисса қўшди.

Қолган дақиқаларда ҳисоб ўзгармади. Шу тариқа, Япония 3-турда ҳам ғалаба қозониб, 9 очко жамғарган ҳолда плей-офф босқичига йўл олди. Ўзбекистон терма жамоаси эса 4 очко билан гуруҳда иккинчи ўринни эгаллади.