Portugaliya terma jamoasi yetakchisi Krishtianu Ronaldu klub rahbariyati bilan yuzaga kelgan nizo fonida «An-Nasr»ning o‘yini va mashg‘ulotini o‘tkazib yubordi va Saudiya Arabistoni chempionatini tark etishi mumkin.

Manbalarga ko‘ra, portugaliyalik hujumchi «An-Nasr» boshqaruvi fond tomonidan raqobatchilarga, xususan «Al-Hilol»ga nisbatan boshqacha amalga oshirilayotganini ta’kidlamoqda. Ronaldu bu kabi siyosat uning jamoasiga chempionlik unvoni uchun to‘liq kurash olib borishga xalaqit qilayotganiga ishonadi. Shuningdek, futbolchi Karim Benzemaning «Al-Hilol»ga o‘tishiga qarshi chiqqan, chunki bu transfer ligada raqobat muvozanatini buzadi, deb hisoblagan.

Avvalroq Ronaldu faqat jamoaning mashg‘ulotini o‘tkazib yuborgani xabar qilingan edi, biroq vaziyat ancha jiddiyroq ekani ma’lum bo‘ldi. X ijtimoiy tarmog‘idagi JK4 akkaunti ma’lumotlariga ko‘ra, hujumchi nafaqat mashg‘ulotda qatnashmagan, balki Saudiya Arabistoni hududini ham tark etib, Portugaliyaga yo‘l olgan.

Jurnalist Abdulaziz Al-Osaymiyning xabar berishicha, Ronaldu avvalgi o‘yinni o‘tkazib yuborgan futbolchilar uchun mo‘ljallangan mashg‘ulotda ham ishtirok etmagan. Bu voqealar fonida OAVda hujumchining iyun oyidayoq «An-Nasr»dan ketishi mumkinligi haqidagi xabarlar yana paydo bo‘ldi. Uning Yevropa klublaridan biriga qaytishi yoki MLS jamoalaridan biriga o‘tishi variantlari ko‘rib chiqilmoqda. Record nashri ma’lumotlariga ko‘ra, Ronaldu shartnomasida ko‘rsatilgan tovon puli miqdori 50 million yevroga teng.