«Chelsi» bosh murabbiyi Liam Rosenyor Angliya liga kubogi yarim finali doirasida «Arsenal»ga qarshi kechgan bahslar yakuni haqida gapirdi. Mikel Arteta jamoasi o‘z maydonida kechgan javob uchrashuvida so‘nggi daqiqalardagi gol evaziga g‘alaba qozondi (1:0). «Stemford Bridj»dagi ilk to‘qnashuvda ham «to‘pchilar» zafar quchishgan edi (3:2).
«Ikkinchi bo‘limda biz o‘zimiz istagan hududlarda ustunlik qildik, biroq bundan foyda chiqara olmadik. Oxirgi daqiqalarda biz kabi bosim o‘tkazilganda, doim gol o‘tkazib yuborish xavfi bo‘ladi. O‘ylaymanki, bugun birinchi o‘yinga qaraganda ancha sezilarli o‘sish namoyish etdik. Ha, mag‘lubiyat doim yoqimsiz, biz keyingi bosqichga chiqishni istagandik, ammo rivojlanishda davom etish muhim va men jamoa yaxshilanayotganini ko‘ryapman», – dedi Rosenyor ITV1 ga bergan intervyusida.
Finalda «Arsenal» «Manchester Siti» hamda «Nyukasl» juftligi g‘olibi bilan kuch sinashadi.
