«Barselona» bosh murabbiyi Xans-Diter Flik Ispaniya Kubogi 1/4 finali doirasidagi «Albasete»ga qarshi o‘yin (2:1) haqida o‘z fikrlari bilan o‘rtoqlashdi. Kataloniyaliklar Lamin Yamal va Ronald Arauxoning gollari evaziga Segunda vakili ustidan g‘alaba qozonishdi. O‘yin so‘ngida maydon egalari bitta gol urishga muvaffaq bo‘lishdi, biroq muvozanatni tiklay olishmadi.

«Bu o‘yinni aslo oson bo‘ldi deb bo‘lmaydi — ayniqsa, uning yakunini. Biz o‘z ishimizni o‘zimiz qiyinlashtirib yubordik. Bunday kubok bahslarida doim qiyin bo‘ladi. «Albasete» ushbu musobaqada haqiqiy mo‘’jiza ko‘rsatdi. Biz esa yana bir bor ko‘plab golli vaziyatlarni ko‘kka sovurdik. Oxirgi paytlarda imkoniyatlardan foydalanish borasida oqsayapmiz — bu jihatni yaxshilashimiz zarur», — deya Flikning so‘zlarini keltirmoqda Barca Universal.

Eslatib o‘tamiz, «Albasete» 1/8 final bosqichida Madridning «Real» klubini musobaqadan chiqarib yuborgan edi (3:2).