«Barselona»ning 18 yoshli futbolchisi Lamin Yamal joriy yilda «Oltin to‘p»ni qo‘lga kiritish imkoniyatlari haqidagi fikrlari bilan o‘rtoqlashdi.

Ispaniyalik vinger o‘tgan yilgi ovoz berish natijalariga ko‘ra, faqatgina «PSJ» a’zosi Usmon Dembelega imkoniyatni boy berib, ikkinchi o‘rinni egallagan edi.

«Men «Oltin to‘p» haqida o‘ylayotganim yo‘q. Hamma narsa jamoa bilan qaysi sovrinlarni yutishingga, o‘zingni qanday ko‘rsatishingga va kimlar ovoz berishiga bog‘liq. Qaror faqat o‘yinga asoslanib qabul qilinmaydi. Mening ustuvor vazifam — futboldan zavq olish hamda «Barselona» va milliy terma jamoa bilan sovrinlar yutish», — dedi Yamal.

Joriy mavsumda Lamin «ko‘k-anorranglilar» safida barcha turnirlarda 29 ta o‘yinda maydonga tushib, o‘z hisobiga 14 ta gol va 13 ta golli uzatmani yozdirib qo‘ydi.