«Барселона»нинг 18 ёшли футболчиси Ламин Ямал жорий йилда «Олтин тўп»ни қўлга киритиш имкониятлари ҳақидаги фикрлари билан ўртоқлашди.
Испаниялик вингер ўтган йилги овоз бериш натижаларига кўра, фақатгина «ПСЖ» аъзоси Усмон Дембелега имкониятни бой бериб, иккинчи ўринни эгаллаган эди.
«Мен «Олтин тўп» ҳақида ўйлаётганим йўқ. Ҳамма нарса жамоа билан қайси совринларни ютишингга, ўзингни қандай кўрсатишингга ва кимлар овоз беришига боғлиқ. Қарор фақат ўйинга асосланиб қабул қилинмайди. Менинг устувор вазифам — футболдан завқ олиш ҳамда «Барселона» ва миллий терма жамоа билан совринлар ютиш», — деди Ямал.
Жорий мавсумда Ламин «кўк-анорранглилар» сафида барча турнирларда 29 та ўйинда майдонга тушиб, ўз ҳисобига 14 та гол ва 13 та голли узатмани ёздириб қўйди.
