«Barselona» 37 yoshli hujumchi Robert Levandovskiga yana bir mavsumga yangi shartnoma taklif qilish imkoniyatini ko‘rib chiqmoqda, biroq maoshi kamaytirilgan holda. Bu haqda ESPN xabar bermoqda.

Manbaga ko‘ra, "ko‘k-anorranglilar" bosh murabbiyi Xans-Diter Flik polshalik futbolchining ishga bo‘lgan munosabatidan, shuningdek, uning o‘yinidan mamnun. «Barselona» hujumchi bilan shartnomani kamida 2027 yil iyun oyigacha uzaytirishning turli variantlarini o‘rganmoqda.

Levandovski «Barselona» safida 2022 yil yozidan beri to‘p surib kelmoqda. Joriy mavsumda u barcha musobaqalarda 27 ta uchrashuvda ishtirok etib, 12 ta gol va 3 ta golli uzatmaga mualliflik qildi. Futbolchining klub bilan amaldagi mehnat shartnomasi 2026 yil yozigacha amal qiladi. Transfermarkt portali ma’lumotiga ko‘ra, Levandovskining bozor qiymati 9 million yevroni tashkil etadi.