«Барселона» 37 ёшли ҳужумчи Роберт Левандовскига яна бир мавсумга янги шартнома таклиф қилиш имкониятини кўриб чиқмоқда, бироқ маоши камайтирилган ҳолда. Бу ҳақда ESPN хабар бермоқда.
Манбага кўра, "кўк-анорранглилар" бош мураббийи Ханс-Дитер Флик польшалик футболчининг ишга бўлган муносабатидан, шунингдек, унинг ўйинидан мамнун. «Барселона» ҳужумчи билан шартномани камида 2027 йил июнь ойигача узайтиришнинг турли вариантларини ўрганмоқда.
Левандовски «Барселона» сафида 2022 йил ёзидан бери тўп суриб келмоқда. Жорий мавсумда у барча мусобақаларда 27 та учрашувда иштирок этиб, 12 та гол ва 3 та голли узатмага муаллифлик қилди. Футболчининг клуб билан амалдаги меҳнат шартномаси 2026 йил ёзигача амал қилади. Transfermarkt портали маълумотига кўра, Левандовскининг бозор қиймати 9 миллион еврони ташкил этади.













