«Bavariya» sobiq hujumchisi Tomas Myuller «An-Nasr» forvardi Krishtianu Ronaldu haqida gapirdi. 2022 yilda portugaliyalik va nemis futbolchilari jamoadosh bo‘lishlari mumkin edi — o‘shanda Ronalduning Myunxen superklubiga o‘tishi haqida xabarlar tarqalgandi. Myullerdan Ronalduni «Bavariya»da tasavvur qila olishi haqida so‘rashdi.
«Eshitishimcha, Krishtianu maydon tashqarisida ajoyib jamoadosh, biroq maydonda uning «tana tili» (harakatlari) menda biroz shubha uyg‘otgan. Ronaldu sport nuqtai nazaridan «Bavariya»da muvaffaqiyat qozonishi mumkin edi, ammo, ta’bir joiz bo‘lsa, Vensan Kompanining futbolida bu ish bermagan bo‘lardi. Chunki bunday o‘yin uslubida barcha 11 o‘yinchi ikkala tomonga (hujum va himoyaga) birdek ishlashi, bir-biriga yordam berishi shart», — deya Myullerning so‘zlarini keltiradi Al Nassr Zone.
Eslatib o‘tamiz, 2022 yilda Ronaldu «Manchester Yunayted»ni tark etgan va 2023 yil boshida «An-Nasr»ga ko‘chib o‘tgan edi.
