Italiyaning Milan va Kortina-d’Ampezzo shaharlarida o‘tkaziladigan 2026 yilgi qishki Olimpiya o‘yinlari bugun, 6 fevral kuni start oladi.

Mazkur musobaqada O‘zbekiston delegasiyasi ikki nafar sportchi bilan uch yo‘nalishda ishtirok etadi. Shuningdek, bugun qishki Olimpiya o‘yinlarining tantanali ochilish marosimi bo‘lib o‘tadi. Unda short-trek bo‘yicha O‘zbekiston milliy terma jamoasi a’zosi Daniil Yeybog delegasiya bayroqdori vazifasini bajaradi.

Ochilish marosimi Toshkent vaqti bilan 7 fevralga o‘tar kechasi soat 00:00 da boshlanadi.

Ma’lumot uchun, O‘zbekiston delegasiyasi ushbu nufuzli musobaqa uchun jami 4 ta Olimpiya yo‘llanmasini qo‘lga kiritgan.

Qayd etilishicha, Dmitriy Chigirev va Yekaterina Geynish figurali uchishning juftlik bahslarida, Medet Nazarov tog‘ chang‘isi sportining slalom va gigant-slalom yo‘nalishlarida, Daniil Yeybog esa short-trekning 500 metr masofasida Olimpiya lisenziyasiga ega bo‘lgan.

Biroq tayyorgarlik jarayonida Dmitriy Chigirev jarohat olib, Olimpiya o‘yinlariga qadar to‘liq tiklana olmadi. Shu sababli O‘zbekiston sportchilari Milan–Kortina–2026 musobaqalarida tog‘ chang‘isi va short-trek yo‘nalishlarida ishtirok etadi.

Eslatib o‘tamiz, qishki Olimpiya o‘yinlari 2026 yilning 6–22 fevral kunlari Italiyaning Milan va Kortina-d'Ampezzo shaharlarida bo‘lib o‘tadi.