Madridning «Atletiko» klubi hujumchisi Xulian Alvares gol urish keskin pasayib ketgani sababli tobora ko‘proq tanqidlarga uchramoqda.
Yakshanba kuni argentinalik futbolchi yana gol ura olmadi, «matraschilar» esa La Liga bahsida o‘z uylarida «Betis»ga imkoniyatni boy berishdi (0:1). Madridliklar bosh murabbiyi Diyego Simeone yulduz forvardni tanaffusdayoq almashtirdi. Endi payshanba kuni «Atletiko»ni Ispaniya Kubogi yarim finali doirasida «Barselona»ga qarshi muhim o‘yin kutmoqda.
«Biz Alvaresga muhtojmiz. Xulian — bizning eng yaxshi o‘yinchimiz, u biz uchun juda muhim. Umid qilamanki, u payshanba kungi «Barselona» bilan bo‘ladigan o‘ta muhim bahsga tayyor bo‘ladi», — dedi Simeone matbuot anjumanida.
Xulian Alvaresning «golsiz seriyasi» allaqachon 11 ta o‘yindan beri davom etmoqda. La Ligada esa 26 yoshli futbolchi 1 noyabrdan beri raqib darvozasini ishg‘ol eta olmayapti.
