Мадриднинг «Атлетико» клуби ҳужумчиси Хулиан Альварес гол уриш кескин пасайиб кетгани сабабли тобора кўпроқ танқидларга учрамоқда.

Якшанба куни аргентиналик футболчи яна гол ура олмади, «матрасчилар» эса Ла Лига баҳсида ўз уйларида «Бетис»га имкониятни бой беришди (0:1). Мадридликлар бош мураббийи Диего Симеоне юлдуз форвардни танаффусдаёқ алмаштирди. Энди пайшанба куни «Атлетико»ни Испания Кубоги ярим финали доирасида «Барселона»га қарши муҳим ўйин кутмоқда.

«Биз Альваресга муҳтожмиз. Хулиан — бизнинг энг яхши ўйинчимиз, у биз учун жуда муҳим. Умид қиламанки, у пайшанба кунги «Барселона» билан бўладиган ўта муҳим баҳсга тайёр бўлади», — деди Симеоне матбуот анжуманида.

Хулиан Альвареснинг «голсиз серияси» аллақачон 11 та ўйиндан бери давом этмоқда. Ла Лигада эса 26 ёшли футболчи 1 ноябрдан бери рақиб дарвозасини ишғол эта олмаяпти.