«Liverpul» bosh murabbiyi Arne Slot o‘z maydonida «Manchester Siti»dan uchralgan mag‘lubiyatdan so‘ng iste’foga chiqarilishi mumkin. «Qizillar» Premyer-liganing 25-turi doirasida kechgan yakshanba kungi bahsda «shaharliklar»ga imkoniyatni boy berishdi (1:2).
«MatchDay Central» xabariga ko‘ra, bugun kechqurun mersisaydliklarning yuqori martabali rahbarlari niderlandiyalik mutaxassisning kelajagini muhokama qilish uchun yig‘ilish o‘tkazadi. Klub allaqachon joriy mavsum davomida Slot bilan xayrlashilgan taqdirda murojaat qilinishi mumkin bo‘lgan murabbiylar nomzodini o‘rganib chiqqan.
Avvalroq tarqalgan mish-mishlar «Liverpul» boshqaruvini o‘tgan oyda Madridning «Real» klubidan bo‘shatilgan Xabi Alonso egallashi mumkinligi bilan bog‘layotgan edi. Ayni damda Angliyaning amaldagi chempionlari turnir jadvalida atigi oltinchi o‘rinni egallab turibdi.
