«Barselona» prezidenti Joan Laporta klub prezidentligiga qayta nomzod qo‘yish uchun iste’foga chiqdi. U bilan birga klub boshqaruv kengashi a’zolari ham lavozimlarini tark etdi. Bu Kataloniya klubida yangi prezident saylovlari oldidan qonunchilikka ko‘ra majburiy tartib hisoblanadi. Laporta o‘zining amaldagi prezidentlik muddati yakunlarini OAV vakillariga taqdim etdi.

«So‘nggi besh yil davomida qo‘llab-quvvatlagan barchaga minnatdorlik bildirmoqchiman. Bu vaqt mobaynida yana “Barselona” prezidenti bo‘lish imkoniyatiga ega bo‘ldim — bu men uchun katta sharaf edi. Men qonun talablariga muvofiq iste’foga chiqyapman, chunki direktorlar kengashidagi hamkasblarim bilan birga qayta saylovlarda ishtirok etmoqchimiz. Ular ham qonun talabiga binoan, qayta nomzod qo‘yish uchun iste’fo berishga majbur bo‘lishdi.

Biz so‘nggi besh yilda bajarilgan ishlardan qoniqqan holda ketyapmiz. Klub barcha jihatlardan besh yil oldingidan ancha yaxshilandi, deb hisoblaymiz, bu esa klubga sadoqat hissiga ega xodimlar hisobiga amalga oshdi — men buni juda qadrlayman. Boshqaruv darajasida ham o‘z ishini yaxshi biladigan va klubga sadoqatli rahbarlar bor. Shuningdek, “Barsa”ni qutqarish kerak bo‘lgan paytda mening prezidentlik lavozimida qolishimga imkon yaratgan direktorlar kengashidagi hamkasblarimga rahmat aytaman. Biz klubni saqlab qoldik va moliyaviy ahvolini tikladik.

Sport yo‘nalishida ham bu yoqimli palla. Direktorlar kengashi bilan birga “Barselona” muxlislariga quvonchni qaytara olganimizdan juda faxrlanamiz. Bugun muxlislar baxtiyor va buning sababi aniq: biz ligada birinchi o‘rindamiz, Ispaniya Kubogida kurashni davom ettiryapmiz, oldimizda “Atletiko”ga qarshi qiziqarli yarim final turibdi, Superkubokdagi g‘alaba esa bu mavsumda sovrinlar sari to‘g‘ri yo‘lda ekanimizni ko‘rsatdi. Umid qilamanki, Chempionlar ligasida ham ilgarilashda davom etamiz», — deya Laporta so‘zlarini Mundo Deportivo nashri keltiradi.

Kataloniya klubining yangi prezidenti saylovi 15 mart kuni bo‘lib o‘tadi. G‘olib esa 1 iyuldan rasman o‘z lavozimiga kirishadi.